motch22222 على كرسي الاعتراف Comin man

sakura كتب:

انا جيت متفرحش اوووي يا سي موتشووو

منور كرسي الصراحة


الله يكرمك
الوقت يداهمني لكن انا هسألك يعني هسألك

ماشى يا ستى
وانا عارفه انك غاوي اجوبة وخصوصا الصريحة منها

للأسف بتودينى ساعات فى داهيه
نقول بسم الله

بسم الله
قول معايا

قلت مره ومع ذلك بسم الله
مش سامعه

لا يبقى اتأكدى بقى من ودنك هههههههههههههههههه
طيب اوك كده كويس


كويس
اول حاجة بطاقة التعارف عشان نتعرف عليك اكثر

بطاقة التعارف :


1)الاسم..........

ياسر هشام
2)العمر...........

16 سنه وشويه

3)الجنسيه..........

الحمد لله مصرى

4)الدوله التي تقيم بها حاليا

مصر
5)المدينه...........

بنها
6)التعليم ...............

يعنى لسه فى ثانوى عام
7)العمل.................

لسه طالب صغنون
حلوه صغنون دى هه
هههههههههههه
8)الوزن :.......

76 كيلو
9)الطول : .........

182 سم

الأمنية اللي تتمناها ... ؟

اغلى امانى ياسر الشخص البسيط انه يموت شهيد

4)ايه أصعب المواقف اللي مريت بها ؟

لا هما كتير قوى بس مش فاكر منهم حاجه دلوقت

5) ايه هو موقفك من الحب ؟؟ وهل جربته ؟؟ هل تأمن بوجوده ؟؟


طبعا جربت الحب وطبعا أؤمن بوجوده لأنه موجود فعلا
ومش ها اخش فى تفاصيل
6)س -فأي قرار تتخذه هل ..... تحكم عقلك أم قلبك فيه ... ؟؟ ومن الأسبق فالتحكيم
مش دايما القلب بيبقى صح لأن فيه مواقف كتير بتحتاج للعقل
لأن القلب بيسلك اى وسيله للوصول لحبيبه دون النظر الى الصعوبات
قلبك أم عقلك ؟؟؟؟؟؟؟؟

بصراحه مش عارف بس فى حاجات كتير قلبى وده اللى ساعات بيعرضى لمواقف صعبه شويه
7) س هل ندمت فحياتك على شي معيّــن ؟؟؟
مفيش انسان ما غلطش ومفيش انسان ما بيندمش
8) س مالفـرق بين الحب والصداقة ؟ وهل يمكن ان يسلكا طرق الغيرة 00؟
الحب ممكن ان يوجد بين الاحبه والأقارب والاصدقاء والحب ممكن يكون كان صداقه واتحول الى حب
انما الصداقه اهم ما فى الوجود دون النظر لأى شئ

انما انا شايف انهم قلما يسلكا طرق الغيره
_ما رأيك بهذه الكلمات ..

الخيانة ..

أحقر ما فى الوجود

المرأه..

سكر الحياه ولكن كثيرا ما تتسبب فى المشاكل ولكنها تظل سكر الحياة

الصداقة ..

نصف الدنيا

النميمة ..
نوع من الخيانه ينهى عنه الله تعالى حيث يجب الا نذكر اى شئ ايا كان فى اى شخص الا اذا كان موجودا معنا
النفاق ..
من أكثر الاشياء المحقره للإنسان
الكذب..

اول طرق الذنوب والمهالك علشان المسلم لا يكذب

الضمير ..

ممكن اسميه الحاسه السادسه لأنه حاسه بداخل الانسان تنبهه اذا ما ارتكب شيئا يغضب الله او شيئا خطأ ايا كان

الضمير الميت...

يهزم فى جميع النهايات ايا كانت قوته

الصراحة...

راحه وزى ما بنقول الصدق منجى

الكذب...

تانى ماشى يا ستى انا قلت مره انه اول طرق الذنوب والمهالك والمسلم لا يكذب

الصدق..

منجى


ما هو تعريفك للمجنون؟؟

فيه انواع كتيييييييييييييير من المجانين وانا واحد منهم

بس انا من النوع المجنون نظام طيش وكده

انما فيه مجانين بالعقل يعنى المجنون شخص فقد عقله او حدث له دمور فى عقله

انما انا مجنون ببعض التصرفات

العاقل؟؟

شخص رزين فى تعاملاته مع الناس وفى كل شئ يحترمه جميع الناس ويقدرونه
المتكبر؟؟

شخص يحب المدح فى نفسه ويحب ان يتكبر على الناس بمنصبه
وساعات بيتكبر بحاجات مالهاش لزمه

الكـذاب؟؟


عنده استعداد لأداء جميع الذنوب حيث ان المسلم لا يكذب والكذب مفتاح كل ذنب

المتواضع؟؟

شخص بسيط جدا لا يحب مدح الناس ويحب البساطه ولا ينتظر شيئا من كلام الناس حيث يرى انه يفعل ما يفعل اداء للواجب ليس الا

المراهق؟؟

شخص يستطيع كبت كل ما فى داخله اذا اراد ولكن معظم المراهقين نفوسهم ضعيفه
اللهم احفظنا
هل انت راض عن نفسك ..؟؟


يعنى، الحمد لله

وما هي المجالات التي تتمنى ان تأخذها منهاجا في حياتك ؟؟


نفسى من زمان ابقى مهندس كمبيوتر

لونك المفضل :

الابيض

أفضل اسم ولد:

هو فيه اسماء كتير بس خير الاسماء ما حمد وما عبد

أفضل اسم بنت:

لا فيه اسامى كتير بحبها من اسماء البنات بس ممكن اقول تسنيم اسم اختى الكبيره

الأمنيه المطلوبه حاليا :

هو حاليا عايز اخلص الاسئله دى على خير
وعايز اعدى من الثانويه العامه على خير

أفضل بيت شعر :

هما كتير خاصة انى بحب الشعر بس حاليا مش حاضرنى اى بيت شعر

افضل المأكولات :

السجق والحواوشى (اكله مصريه )

أفضل المشروبات :

عصير المانجو وميريندا تفاح اخضر جديده وشديده

أوصف الحب بكلمتين :

حياة الروح

ردة فعلك من انسان جرحك قدام الكل ؟؟


يللا بقى ربنا يسامح الجميع

9-ايهما أصعب خيانة الصديق الكــاذب ام خيانة الحبيب الكــاذب ؟؟


السؤال ده جاى فى الجون
طبعا خيانة الصديق الكاذب لأنه من الصعب وجود صديق فى الايام دى يعنى

لو صاحبى قوى من زمان وخانى اكيد عمرى ما هانساهاله لأنه ما حسبش العشره اللى كانت بيننا وكده
10-متى يسقط الرجل من نظرك ؟ متى تسقط المرأه من نظرك؟؟


يسقط الرجل من نظرى اذا نافق شخص ما ايا كان هذا الشخص

وتسقط المرأه من نظرى اذا تبرجت وتبهرجت
اظن مفهوم قصدى

11- كلمه تحب تسمعها دائما وتريحك كثير؟؟

الله يكرمك اكيد احلى كلمه

وطبعا اى دعوه من والدتى

12-لما تبص على موبايلك لما بيرن من تتمنى المتصل ان يكون ؟؟

حد فى بالى بس اكيد رقم دولى

13-من هو الشخص اللي ما ترفضش له طلب ..؟؟

خالى اشرف وطبعا جدتى والدة والدى وكذلك والدة مامتى
انما خالى اقرب ليا من كل اللى فى الدنيا

_ ماهي ايجابياتك وسلبياتك بكل امانــــــه ؟؟

ما اقدرش اقول ايجابياتى لأنى ابقى بكده بمدح فى نفسى وانا مش بحب كده
انما سلبياتى كتير يعنى مثلا مجنوووووووووووون وفيه شوية طيش وجرئ زياده عن اللزوم

مطرب او مطربة مبتقدرش تقاوم انك تسمع اغانيهم؟؟؟

كتييييييييييييييييير بس اكيد سيلين ديون لأن كل اغانيها تمام و اكون، ومن العرب عمرو دياب الاسطوره

اغنية متزهاقش منها ابدا؟؟

no promeces

ممثل او ممثلة بيعجبك تمثيله اووي؟؟

الممثل المصرى خالد صالح وبرضه احمد السقا

ماذا تعني لك قوة الشخصية؟؟؟ ياريت تقولنا عن صفات قوي الشخصية في نظرك؟؟

قوة الشخصيه دى اهم ما فى الانسان لأن الانسان ضعيف الشخصيه ضعيف فى كل شئ حتى فى حياته
وقوى الشخصيه بالنسبه لى لازم يحقق كل اللى هو عايزه ولو هو صح فى حاجه لازم يمشى كلامه على الكل وصفات كتييير كتير كتير لاتعد

طب ايه رايك في ضعف الشخصية؟؟ وممكن كمان مميزات ضعيف الشخصية بالنسبالك؟؟

انا لسه قايل فوق ان ضعيف الشخصيه ضعيف فى كل شئ حتى حياته لأن ضعيف الشخصيه ما يقدرش يمشى رأيه فى شئ وماحدش بياخد باله من كلامه قوى
أين تصنف نفسك منهما..؟؟

الحمد لله قوى الشخصيه

هل اضطررت يوما ما ان تخترع شئ لتكسب محبة الاخرين او ثقتهم؟؟

انا ما اقدرش ابدع فى حاجه غير الكمبيوتر والسباحه بس اكيد حصلت معايا مع الكمبوتر
علشان كده بابا لو حصل اى شئ فى المكتب ما بيوديش شركات صيانه
مش انا موجود

صف نفسك(معنويا ليس شكليا) في جملتين...

شخص بسيط عادى جدا وشويه رومانسى
قوى الشخصيه عنيد مجنووووووووووون

وشكرا لانك استحملتني يا موتشوو

انا تحت امرك يا ساكورا

سمعتك بتقول الحمد الله ماشي يا سيدي

الحمد لله يا ستى
ولي عودة في اقرب اقرب وقت..

وانا مستنى

وهاتوا ما عندكم يا بشررررررررررررررر


سلام
سلاااااااااااااااااااااحف

Mody كتب:

يا قوي على كل قوي يا رب




هيييييييييييييييييييييييييييييييييييييييييييييه


بييييييييييييب بييييييييييييييييييييييييييييييييييب

وسع الطريييييييييق


اهلا موتشو


أهلا بسعادتك

جاهز؟؟




تقريبا

و حتى لو مش جاهز هتتسأل


ربنا يستر

بس اقولك ايه انا ولا ايه مانت عارف انا عارف ايه


لا مش عارف

بس يلا




يللا احنا بنخاف

خد دول




مش معايا حاجه اخد فيها

1. ازي الصحة يا موتشو؟؟




تمام الحمد لله

2. بتحب القراءة؟؟




ايوه

3. تعرف الفرق بين خيانة الحبيب و خيانة الصديق؟؟


يعنى اسمع عنه ههههههههههه

4. أذكر الفرق ده


الفرق كبييييييييير يا مودى وان الحبيب ممكن يتعوض والانسان بيمر بتجارب انما الصديق لا يمكن يتعوض خاصة ان لو كان فيه عشره وكده

5. سمعت سمع خير انك مستني رقم دولي


خير اللهم اجعله خير

يا ترى الرقم ده تعرف تبع شبكة ايه اصلا؟؟


والله يا ابنى ما اعرف

6. لمين الرقم ده في نظرك؟؟


شخص ما فى بالى

7. انت حبيت؟؟


للأسف ايوه

8. هل سافرت بره مصر قبل كده؟؟ جاوب ما تخافش


ايوه

9. اطول فترة قعدتها بعيد ن بيتك اد ايه؟؟


سنه

10. هاتلي موقف خلاك تعيد تفكير في نقطة و تقوله و ما تقولش مش فااااااااااكر


يعنى حبيت مره من غير ما احسبها بعقل وده خلانى اعيد التفكير واحاول ابطل امشى ورا قلبى



وادينى بحاول

11. تفتكر انك فلانتينو بجد؟؟


ده على حسب رأيكم فيا

بس انا شايف انى انا كده وعاجبنى كده

12. بتحب تحب ولا تتحب ولا تتسلى تحت اسم الحب؟؟


لا طبعا احب اتحب

13. خدعت حد قبل كده؟؟


هو انا مش بحب الخداع ولا عمرى حبيته بس لو خدعت حد يبقى خدعتك انت يا مودى فى حاجات كتيييييييييير

14. ايهما اكثر مرارة بالنسبالك؟؟ ان واحد يخدع واحدة ؟؟ ولا واحد يخدع واحد؟؟




هيا كل واحده وليها مراره بس واحد يخدع واحده ده شخص ماعندوش ضمير انما واحد يخدع واحد دى بتحصل كتير



بس انا شايف ان الاكثر مراره ان واحد يخدع واحده

15. بماذا تسمي اختراع الرجل قصص وهمية لبناء شحصية وهمية حوله؟؟
حوله يعني around him مش حوووووووولة


اسميه كذب ونفاق وادعاء



وللا انت شايف ان ليه اسم غير كده

16 . عيشت كام قصة حب رغم صغر سنك؟؟


هيا واحده بس

19. بتحب الكورة؟؟




جدا

20 . هل تعتقد ان اي حب في سنك الحرجة دي و ما تفهمنيش غلط يعتبر حب مراهقة؟؟




انا عن نفسى ما اعتقدش ان اللى انا مريت بيه حب مراهقه علشان انا ها افضل احب اللى انا حبيتها دى طول عمرى علشان مش ها اقدر انساها



انما الانسان بيعدى على تجارب كتير بدليل انى ما حبيتش فى بداية سن المراهقه وماكانش فى بالى الحب اصلا فى السن ده على الرغم من الجانب الرومانسى فيا

21. بلد نفسك تزوره؟؟


ممكن نقول فرنسا او الجزائر



يعنى لغه واحده هههههههههه

معظم الاحيان

22. يلا نعرف رأيك يا معلم في

موتشو


قلت مره انى ما اقدرش اقول رأيى فى نفسى لأنى ابقى بكده بمدح نفسى وده شئ ضد مبادئى



انما اكتفى انى اقول انى انسان بسيط

موتشو تاني


اقرا اللى فوق وانت تعرف

موتشو كمان مرة بس المرة دي اكدب علينا


لازم يعنى



على العموم مش بعرف اكدب يا مودى

Bluewild Dragon


عضو مرح جدا نشيط بس ساعات بيغيب عننا

yahia


بقاله فتره مش بيخش انما كان مظبطنا بمواضيعه لما كان بيعبرنا

lola


عضوه مرحه نشيطه مواضيعها كلها وان قلت عاجبانى

Sakura


عضوه برضه مرحه ونشيطه ودى اعتقد قبل مصطفى عاطف الوحيده اللى من سنى فى المنتدى ههههههههههههههه



بس هيا عضوه محبوبه ومواضيعها بتبهرنى

MooNLighT




عضوه نشيطه ومرحه ومواضيعها عاجبانى بس مش مهتمه ببعض الاقسام شويه

Mody


حبييييييييبى منور والله

ده المدير يعنى ممكن نتاخد امن دوله

بس انا مش بخاف من حد يا معلم

هو عضو عارفه واقرب عضو اقدر اشوفه وانا بقول عضو علشان نبقى كلنا واحد ههههههههههه

بس هو نشيط فى جميع الاقسام وكل حاجه بيعملها تمام بعيدا عن الغروووووور



واخد بالك يا ابن عمى

Shghal


بقاله كتيييييييييييييييييييير منفضلنا وقل تواجده بيننا ومش عارف ليه مزحلقنا كده بس مواضيعه حلوه لما بيخش يعنى

motchoo22222 رابع مرة


ده غير اللى فوق

ماشى زى ما قلت واحد عادى بسيط مش اكتر

23. الكدب مالوش رجلين ... حصلك موقف يبين لك ان المعلومة دي صح؟؟


اكيد حصلى بس معلومة ايه يا مان

24. ايه نوع موبايلك؟؟


nokia 1208 مؤقتا

25 . هل انت انسان مسطول قصدي مسئول و محل ثقة؟؟
اختر بين (( لا او لآ ))




الاجابه الثالثه اللى هيا ايوه

27. نفسك تقابل مين من اعضاء المنتدى؟؟ طكبعا ما عدايا


يا عم الحج انا بشوفك كل يوم يعنى ارحمنى بقى

بس انا عن نفسى عايز اقابل روجير

28. لو هتعزمنا كلنا بربطة المعلم على العشا تأكلنا فين و ايه؟؟ و حياة ابوك يا شيخ ما تقول عند نجف


ههههههههههههههههههههههههه ليه يا عم اشمعنى نجف ما الغمرى موجود



بهزر اكيد ماحدش فاهم غير مودى وحسين



بس على العموم انا اعزمكم كلكم بربطة المعلم عندنا فى البيت ونعمل حوواشى وسجق

اصلى بينى وبينكم بحبهم قوى

29. بتعرف تطبخ؟؟و بتطبخ ايه؟؟


طبعا مين مش بيعرف يطبخ



انا بطبخ البيض بأنواعه

هههههههههههههههه

لا يعنى بجد بعرف اعمل الحواوشى والسجق والرز المفلفل وبعض انواع الطبيييييييييييخ

يعنى على قدى كده

30. مواصفات فتاة احلامك


تكون ذكية وتفهمنى وتحبنى وكل الكلام الحلو ده



وانا مش ببص اوى على الجمال بس عن نفسى بقول لو كانت معقوله مش مشكله المهم اللى فوق ده

31. صفات وحشة فيك و عاوز تمحيها


يعنى كتييييييييييير يعنى الجنوووووووووون ده عايز اعقل شويه بس انا مش ببقى مجنون الا وسط اصحابى وانا جرئ زياده عن اللزوم يعنى لو اعرف اقلل الجرأة دى يبقى تمااااام

واكيد فيه صفات تانيه بس انا عايز حد يقولهالى وانا احاول اغيرها

32. صفات حلوة فيك و عاوز تنميها


الصراحه والشجاعه فى مواجة المواقف ايا كانت وانى اجتماعى شويه مش ها اقول شويه انا اجتماعى زياده عن اللزوم وده بيحطنى ساعات فى مشاكل



بس انا بمووووووووووت فى حاجه اسمها كمبيوتر ونفسى من زمان ابقى مهندس كمبيوتر وانا بصلح فيه الحمد لله حاجات كتير هارد وسوفت

33. ايه نوع العربية اللي نفسك تشتريها؟؟


skoda octavia a5





34. مش ناوي تودي العجلة للتوكيل؟؟


لا يا عم العجله دى مش عجله اصلا دى عايزه عجله علشان تتصلح

بس انا بفكر اخد عجلة بابا السباق اللى هو خايف عليها اصلا (اصلها جاياله من زمان ونوع العجل الاصيل بقى مش بتاع اليومين دول)

35. صحيح يا موتشو اول ما تجيب عربية تحب توصل مين بيها؟؟


اوصل بيها محمد ابن عمى بس اقعد اقول الله اكبر الله اكبر هههههههههههههه



بس اوصله فين

كفاية كده عشان عاوز انام


ماشى

تصبح على خياااااااااار وأته

يا ريت الاجابات بسررررررررررررررررعه



ماهى عندك اهه

MOONLIGHT89 كتب:
اهلا اهلا و مية سهلا شو اخبارك خيي يا رب تكون مليييييح و مرتاح ع الكرسي

الحمد لله يعنى شويه

بتحب نبدا بالاسئلة و لا خليك تاخد نفسك عمييييق الاول

لا اخد نفس عميق

يلا يا موتشو شهيق زفييير شهيق زفير ايو الله هكدا راك انتيك

ايه الكلام اللى فى الاخر ده انا حاسس انى بتشتم

بصح ما تزعفش بزاااااااف ما نيش راح نطول عليك ان شاء الله و ما تقوليش ترجميلي

لا وترجمى ليه ما الترجمه زمنها ها تنزل مع النسخه الفيديو سى دى

يلا نقول بسم الله

بسم الله
عامل ايه مع الدنيا ؟؟؟؟ ايه اخبار الكرسي معاك يا موتشو؟؟؟

تمام الحمد لله، بس انا كنت فاكر انه مريح لحد ما..........

ايه رايك في اسئلة ساكورا ؟؟؟ في اسئلة مودي ؟؟

ها اقول ايه بقى غير كل واحد منه لله
هههههههههههه

هل جاوبت بصراحة ؟؟؟؟

الحمد لله

احكيلنا موقف مضحك حصل معاك ؟؟؟ و كمان موقف محرج جدا حصلك ؟؟؟ ما تقولش مش فاكر

المضحك انى كنت ها اموت بسبب العند علشان كان فيه كابتن معانا فى السباحه راهنى انى اعوم 125 متر under water continueيعنى من غير ما اخد نفس فى النص وفعلا عملتها بس ساعتها شربت كمية مية من الحمام ما شربتهاش فى حياتى شفتم الغباء

وبالنسبه للمحرج انى فى مره جيت قعدت ماشى ورا واحده اندهلها باسم اختى وانا فاهم انها اختى لحد ما لفت وقالتلى انت قليل الادب بس الحمد لله طلعت صاحبة اختى وهيا برضه اتفاجأت بس انا كنت ساعتها فى نص هدومى وقعدت اعتذرلها واتأسف كتيييييييييييييير

اجمل هدية تهديتلك ؟؟

مش فاكر والله بس ممكن اقول اجمل هديه ان مودى عرفنى على المنتدى الجميل ده
فاكر يا مودى

مستواك في الدراسة( يعني التقديرات اللي بتاخدها ) ؟؟؟ خليك صريح

بصراحه انا ببص للامتياز بس انا فى الدراسه جيد جدا

بتلعب سباحة و رياضة ؟؟؟ اخدت جوايز قبل كده او القاب ؟؟؟

ايوه انا طالع مركز ثانى جمهوريه فى السباحه واول جمهوريه فى الكاراتيه

وبالنسبه للمحافظه بتاعتى ان طالع اول قليوبيه سباحه واول قليوبيه كاراتيه برضه

مثل بتحبو و بتؤمن بيه جدا ؟؟؟ مثل بتكرهو و حاسو عبيط ؟؟؟ (مثل يعني حكمة او مقولة)

عارف ده احنا فى مصر اللى بدعنا الامثال
بس بصراحه فيه امثال كتييييييييير بحبها وبؤمن بيها جدا
زى مثلا تفائلوا خيرا تجدوا

انما اللى بكرهه الامثال العبيطه زى
يدى الحلق للى بلا ودان
وامثال ثانيه مش فاكرها علشان حاسس انها بتعترض على تقسيم الارزاق

من هو موتشووو الحقيقي مش بتاع المنتدى ؟؟؟

موتشو الحقيقى هو ياسر شخص بسيط جدا عادى ومش ها اقول اكتر من كده

ما تقوليش مش انا اللي هاتكلم في نفسي و جاوب بصدق

ماشى يا ستى انا اللى جوه المنتدى هو انا اللى بره المنتدى بس جرئ زياده عن اللزوم واجتماعى برضه زياده عن اللزوم ومش بحب المشاكل
وبكره النوم وبحب الحياه ومتفائل
وبس

اكتر حاجة بتحبها في نفسك ؟؟؟

التفاؤل

اكتر حاجة بتكرهها في نفسك ؟؟

الجرأه الزايده عن حدها ساعات بتحطنى فى مواقف مش حلوه

ايه رايك في الراجل اللي يعيط قدام كل الناس ؟؟؟

لا لو لازم يعيط ولا بد انه يعيط ويخرج الكبت اللى جواه
يبقى فى حته مداريه انما لو فيه حاجه شديده قوى يبقى غصب عنه لازم هيعيط واللى يبصله بنظره مش حلوه يبقى ماعندوش دم علشان لازم يقدر الموقف

ايه رايك في الراجل اللي يكتم مشاعرو و احاسيسو و لا يؤمن بالحب لانه فقط" رجل "؟؟؟

سورى يعنى فى الكلمه يبقى متخلف شويه

تفتكر الرومانسية الملونة هي الطريق لكسب قلب المرأة مع انه يعتبر خداع؟؟؟

وليه خداع يعنى الرومانسيه مش انواع الرومانسيه صراحه انما اللى بيستخبى ورا قناع الرومانسيه ده بقى يبقى مش رومانسى ده شخص مخادع

هل انت رومانسي ؟؟؟

يعنى على حسب رأى الناس فيا بس انا رومانسى ومش ها اقدر انكر كده

اكتر حاجة نفسك فيها دلوقتي ؟؟؟

اخلص اسئلتك على خير

هدف عاوز تحققو و توصلو بشدة ؟؟

قلت مره اسمى هدف عندى انى اموت شهيد

ما رايك في المرأه اللي عندها شخصية قوية ؟؟؟ من هي المرأه المثالية في نظرك؟؟؟

المرأه اللى شخصيتها قويه بتبقى كويسه انما قوة الشخصية بتخلق العند عند صاحبها يعنى قوية الشخصيه بتعاند قدام اى حد حتى لو كان جوزها وده بيؤدى لفشل العلاقات واظن ده واضح
انما المرأه المثاليه هى المرأه التى تفهم الرجل وتقدره وتراعيه وتحبه وتسايسه وتقدر تمشى امورها وتقدر تبقى ناجحه فى حياتها
بس بينى وبينك ما فيش مرأه مثاليه علشان ما فيش حد مثالى

لمن تهدي


وردة بيضاء

لخالى اشرف

وردة حمرا ء

لواحده فى بالى

كلمة عتاب

لنفس الواحده اللى فى بالى

كلمة شكر

لجدتينى اللى هما والدة والدى ووالدة والدتى

كلمة حب

لنفس الواحده اللى فوق

نظرة اعجاب

مش عارف بصراحه

نظرة كره

لا انا مش بكره حد

قبلة

والدتى

حضن

والدى

اغلى هدية في الكون

حبيبتى

نظرة احتقار

اى شخص منافق

علبة شوكلاطة

هههههههه ليكى انتى

علبة متفجرات و مجموع صواريخ

مودى حبيبى
هههههههههههههه

خلاص ياعم تعبت هارجعلك بعدين

وانا بقى ما تعبتش ومستنى الاجمد
ههههههههههههه
احنا ما بيهمناش حد

يارب تكون اسئلتي خفيفة و سهلة الهضم من غير كوباية مية بعديها

لا دى كانت تمام تصدقى لسه شارب ازازة ميريندا تفاح دلوقت

يلا اسيبك تمسح عرقك عشان عارفة الاسئلة بتدوخ يلا سلام

لا على فكره بقى انا سقعان كمان
ههههههههههههههه

و لنا عوددة باذن الله و اتركك في امان الله و حفظه
منتظر اسئله احلى واجمد ان شاء الله

bluewild dragon كتب:



اهلا يا سى موتشو



اهلا بيك يا بوب

يا رب يا مسهل مش عارف مش بحب اكتب على الكى بورد كتير بس يلا بقى علشان خاطرك انت بس
المهم
لو مستعد للاجابه على الاسئله اضغط الرقم واحد لو غير مستعد اضغط اثنين
والله ينفع اشتغل فى موبينيل


اه والله يبقى ليك مستقبل فيها

المهم
اولا
اسمك موتشو معناه ايه وليه سميت نفسك كده

اسم موتشو ده اسم تنين صينى فى اسطوره من الاساطير الصينيه وهبقى اكتب موضوع عنه قريب فى كان ياما كان

يعنى من الآخر

i'm legened
ليه اخترت تكون مشرف رومانتك



علشان شايف نفسى فيها ودى طبيعتى يعنى

الى بعده علل
(افصل يعنى )
هل لانك مشرف رومانتك لازم تكون بقى رومانسى


طبعا والا مش ها احس باللى بكتبه وها يطلع كله كلام فارغ مالوش لزمه

بينى وبينك يا ابنى من تحلليلى لكلامك مش لسه هسلك بقى واضح عليك انك بتحب ومش بس ده
انت غرقان لشوشتك
صح ولا



للأسف ايوه
او تنكر



يا عم الحج انا قلت حاجه

الانكار مش هيفيدك اعترف


هو انا قلت حاجه يا مان ومع ذلك انا معترف وأطالب بتنفيز اقصى العقوبه هههههههههههه

طيب سؤال شخصى عنى انا بقى ايه رايك فيا



بصراحه انت شخص مرح جدا حبوب ونشيط بس ليك ساعات كده مرات بتغيب عننا فيها بس لعل المانع خير بس انا ما قابلتكش شخصيا يعنى علشان اقول اكتر من كده
وايه كان اول انطباع عنى انا عايز اجابات صريحه


عادى زى اى عضو كلكم اخواتى

وكفايه كده عليك وGOOD LUCK

ماشى يا سيدى وابقى هات ما عندك احنا ما بنخافش