حوار مع السيد المسؤول

من طرف **Mody** الثلاثاء سبتمبر 16, 2008 3:33 pm

المذيعة: عودة للمسئول العظيم اللي يقدر يعمل كل حاجة في البلد وهو قاعد على كرسيه هنا
معانا.. عشان بس عايزين نعرّف الناس ان الحكومة دي مظلومة وانهم مفتريين وبيستهبلوا.. نرجع ونكلم حضرتك عن موضوع شاغل الرأي العام فترة طويلة خالص وهو موضوع العبارة الى غرقت
المسؤول: غرقت ايه وهو انتي بتصدقي الكلام ده؟
المذيعة: همّ بيقولوا كده
المسؤول: هفهمك انا الموضوع كله، حضرتك عارفة فيلم تايتانك؟
المذيعة: اه ليوناردو دي كابريو كان اموور اوي في الفيلم بصراحة
المسؤول: اهو الموضوع كله ان ممدوح سليمان
المذيعة: ممدوح اسماعيل يافندم
المسؤول: اه معلش.. حضرتك الفيلم ده كسر الدنيا وجاب عائد مادي ضخم جداااا فممدوح اسماعيل حب يعمل فيلم مصري خاص عشان يجيب عائد مادي لمصر.. فخرّب العبارة بتاعته.. الراجل الحق عليه عشان اما تغرق يصورها ونعمل فيلم مصري عالمي.. بس ده كل الموضوع
المذيعة: طب يافندم في ناس بيقولوا ان في ناس ماتت بجد
المسؤول: ياستّي الاعمار بيد الله
المذيعة: بس المفروض ان ممدوح اسماعيل يعوّضهم
المسؤول: وهو في بعد تعويض ربنا؟
المذيعة: طب هو فين الفيلم ده يافندم؟
المسؤول: للأسف الشديد المصور وهو بيصور الفيلم غرق.. فبالتالى مفيش فيلم من اصله
المذيعة: يعني ممدوح اسماعيل كان عايز يعمل فيلم عالمي زي تايتانك
المسؤول: زي ما بقولك كده
المذيعة: وبالتالى اعزائي المشاهديين احنا كده عرفنا قد ايه احنا ظلمنا الراجل
نعود بعد الفاصل في برنامجنا حوار مع السيد المسؤول
*******
:: فاصل :::

المذيعة: احنا ممكن نستقبل اتصالات دلوقتي.. يافندم حضرتك مستعد تفتح صدرك للمواطنين وتسمعهم
المسؤول: طبعا طبعا انا تحت امر المواطنين
المذيعة: نقول الو
المواطن: الو سلامو عليكم
المذيعة: وعليكم السلام اتفضل يااستاذ
المواطن: انا بس كنت عايز اقول للسيد المسؤول ان انا ابني في المعتقل بقاله 12 سنة ومعرفش عنه حاجة انا بس عايز اعرف هيخــ
......
المذيعة: ألو ألو.. واضح ان الخط اتقطع
المسؤول: فعلا واضح ان الخط اتقطع.. حضرتك شديدة الملاحظة
المذيعة بكسوف شديد: ميرسي جدا يا فندم ده بس من ذوقك.. بس هو كان بيسأل عن ابنه اللي في المعتقل بقاله 12 سنة
المسؤول: هو كان بيقول معتقل ولا اتنقل؟
المذيعة: لا انا سمعتها معتقل
المسؤول: وانا سمعتها اتنقل.. هو انتو هتسمعوا احسن من الحكومة؟
المذيعة بوش اصفر وخلاص هيغمى عليها: لا يافندم وهيّ دي تيجي؟ هو فعلا قال اتنقل.. اتنقل من شغله لشغل تاني وبعد ما حالة اتظبط ساب العيلة اللي كان عايش فيها
المسؤول: اه انا سمعت كدة برده
المذيعة: فاصل مع الاعلان ونعود ليكم على طول
*******

[/size]
*******
المذيعة: بعد الفاصل عدنا اليكم من جديد ومعانا ضيفنا المسؤول المهم في الحكومة المظلومة وبنسأله ونقوله ايه رأي حضرتك في الكليبات اللي بتتعرض على القنوات الفضائية المصرية اليومين دول؟
المسؤول: والله حاجة جميلة ونقلة في ثقافة البلد وثقافة ابناء وبنات البلد
المذيعة: بس في اعتراضات من بعض المشاهدين على ملابس بعض الفنانات وعلى راسهم الفنانة هيفاء.. بالذات بعد اغنية بوس الواوا
المسؤول: انا مش شايف اي حاجة في كليب الاغنية دي.. وبعدين دي بتغني لابنها الصغير يعني ده عيل صغير اولا.. وبعدين الناس حرة في بيوتها تعمل اللي هيا عايزاه
المذيعة: طب والمغنية التانية اللي فضلت تخلع في هدومها من اول الكليب لاخره
المسؤول: على فكرة دي من اجمل الكليبات اللي اتعملت.. مش دي الاغنية اللي بتقول
ليه تجرحني وليه تخدعني
ليه يا حبيبي بتسطلطخني
لية يا اناني يا كذاب
هو انا راكنة الفيل على الباب
المذيعة بفرحة شديدة: الله ده حضرتك حافظ الاغنية كلها
المسؤول: طبعا دي اغنية جميلة اوي
المذيعة: ايوة بس دي على اخر الاغنية كانت خلعت كل هدومها
المسؤول: واضح ان حضرتك ما سمعتيش الاغنية كويس لانها في اخر الاغنية قالتله
وادي هدومك مش عيزاها
عليّ النعمة منا لبساها
يعني الكليب بيحكي واقع كلمات الاغنية.. انا مش عارف معترضين على ايه
المذيعة: والله يافندم انا مش عارفة اقول ايه.. حضرتك وضحت كل الامور بكل بساطة وهدوء
المسؤول: ده واجبنا تجاه وطنا
المذيعة: السادة المشاهدين في نهاية الحلقة بنحب نوجه الشكر لكل رجال الدولة القائمين على حماية البلد والساهرين على امنها.. والى اللقاء في حلقة جديدة من برنامجكم المفضل لقاء مع السيد المسؤول
*******

من طرف **motcho22222** الثلاثاء سبتمبر 16, 2008 6:15 pm

ههههههههههه ههههههههههههههههههههههه ههههههههههههههههههههههههههههههههه

الله عليك يا مودى يا جامد يا رايق يا تمام

الضحك فعلا للصبح

موضوع تماااااااااام اوى يا مودى

شكرا على المساهمه

من طرف **shghal** الخميس سبتمبر 18, 2008 11:34 pm

المسؤول: اه معلش.. حضرتك الفيلم ده كسر الدنيا وجاب عائد مادي ضخم جداااا فممدوح اسماعيل حب يعمل فيلم مصري خاص عشان يجيب عائد مادي لمصر.. فخرّب العبارة بتاعته.. الراجل الحق عليه عشان اما تغرق يصورها ونعمل فيلم مصري عالمي.. بس ده كل الموضوع
المذيعة: طب يافندم في ناس بيقولوا ان في ناس ماتت بجد

مش لازم يبقى الفيلم واقعي والناس تصدقة من قلبها فكان لازم نضجي بكام شاب وكام أم كدة المهم نشرف مصر

وأهو كلة عشان وطنا مصر

المذيعة: ايوة بس دي على اخر الاغنية كانت خلعت كل هدومها
المسؤول: واضح ان حضرتك ما سمعتيش الاغنية كويس لانها في اخر الاغنية قالتله
وادي هدومك مش عيزاها
عليّ النعمة منا لبساها

معلشي أعتقد إن المسئول

غلط في حاجة صغيرة أصل انا برده بحب الأغنية دية وحافظها

هية قالت
وادي هدومك مش عيزاها
عليّ النعمة لنا ألعاها

بس عادي ده غلط طفيف ممكن يقع فيه أى مسئول كبير بحكم ضغوطات الكليبات اليومين دول

--------
وطبعا بقولك يا مودي

برافووووووووو عليك

لأنك اقتحمت الأبواب المغلق وجبتلنا الحوار الهايل ده

مع إنه ممنوع من العرض

rendeer

حوار مع السيد المسؤول

حوار مع السيد المسؤول

رد: حوار مع السيد المسؤول

رد: حوار مع السيد المسؤول